कुवेत सिटी । कुवेत सरकारले देशमा सञ्चालित एक मात्र इरानी विद्यालय बन्द गर्न आदेश दिएको छ। शिक्षा मन्त्रालयका एक स्रोतले बिहीबार एएफपीलाई यसको पुष्टि गरेका हुन्। यो निर्णय मध्यपूर्वमा जारी द्वन्द्वका क्रममा इरानबाट कुवेतमाथि पटक–पटक आक्रमण भएको पृष्ठभूमिमा आएको हो।
शिक्षा मन्त्रालयले विद्यालय बन्द गर्नुको विस्तृत कारण सार्वजनिक नगरे पनि, इरानी सरकारसँग सम्बन्धित संस्थामाथि सुरक्षा तथा कानुनी आधारमा निगरानी बढाइएको जनाइएको छ। यसअघि पनि क्षेत्रीय तनाव बढेपछि इरानसँग सम्बन्धित विद्यालय तथा स्वास्थ्य संस्थामाथि यस्तै कदम चालिएका थिए।
अमेरिका र इरानबीच भएको युद्धविराम भङ्ग भएपछि पछिल्ला केही सातादेखि कुवेत र बहराइनमा इरानी आक्रमणको प्रभाव बढी परेको बताइएको छ। कुवेतका विद्युत् उत्पादन तथा समुद्री पानी प्रशोधन (डिसेलिनेसन) प्लान्टहरूमा पटक–पटक आक्रमण भएपछि गत महिना सरकारले नागरिकलाई विद्युत् बचत गर्नसमेत आग्रह गरेको थियो।
एएफपीले प्राप्त गरेको शिक्षा मन्त्रालयको निर्णयअनुसार शिक्षामन्त्रीले निजी इरानी विद्यालयको शैक्षिक इजाजतपत्र रद्द गर्दै विद्यालय बन्द गर्ने आदेश दिएका छन्। साथै, आगामी शैक्षिक वर्षका लागि नयाँ विद्यार्थी भर्ना स्थगित गरिएको छ र अभिभावकलाई आफ्ना बालबालिकालाई अन्य विद्यालयमा स्थानान्तरण गर्न अनुरोध गरिएको छ।
यसअघि मार्चमा संयुक्त अरब इमिरेट्स (यूएई) ले दुबईस्थित इरानसँग सम्बन्धित एक अस्पताल बन्द गर्न निर्देशन दिएको थियो। त्यस्तै, कम्तीमा चार इरानी विद्यालय पनि बन्द गरिएका थिए।
त्यतिबेला यूएईका एक अधिकारीले एएफपीसँग कुरा गर्दै इरानी शासन तथा इस्लामिक रिभोलुसनरी गार्ड कोर्प्स (आईआरजीसी) सँग प्रत्यक्ष सम्बन्ध रहेका केही संस्थाविरुद्ध लक्षित कारबाही गरिएको बताएका थिए। ती संस्थाले यूएईका कानुन उल्लङ्घन गरेको पाइएको दाबी पनि गरिएको थियो।
