निकोसिया, साइप्रस | प्रवासमा रहेर नेपाली मौलिक कला, गला र संस्कृतिको जगेर्ना गर्ने उद्देश्यका साथ ‘नागरिक बोली’ द्वारा आयोजित अनलाइन गायन प्रतियोगिता साइप्रस नेपाली भ्वाइस’ अनलाइन गायन प्रतियोगिता को पहिलो संस्करण भव्य रूपमा सम्पन्न भएको छ। झन्डै दुई महिना चलेको यो साङ्गीतिक महाकुम्भमा निशा बिश्वोकर्माले उपाधि चुम्न सफल हुनुभएको छ।
रोचक प्रतिस्पर्धा र अन्तिम नतिजा: शुक्रबार आयोजक समितिले सार्वजनिक गरेको अन्तिम स्कोर-कार्ड अनुसार, निशाले निर्णायकहरूको प्राविधिक मूल्याङ्कन र सामाजिक सञ्जालमा प्राप्त जनमत (Like, Comment, Share) का आधारमा कुल ७६.३३ अङ्क प्राप्त गर्दै ‘विजेता’ को इतिहास रच्नुभएको हो।
प्रतियोगितामा उत्कृष्ट गायकी प्रस्तुत गर्नुभएकी डोल्मा योल्मोले ७१.१८ अङ्क सहित द्वितीय स्थान हासिल गर्नुभएको छ। यस्तै, मिङ्गमार दोर्जे लामा ४७.०३ अङ्कका साथ तृतीय दुर्गा कार्की ४५.६१ अङ्कका साथ चौथो र पाचौ स्थानमा समीर भट्टराई २९.६४ अङ्कका साथ रहन सफल हुनुभएको छ।
प्राविधिक चुनौती र पारदर्शी छनोट: प्रतियोगिताको दौरान टिकटकमा देखिएका केही प्राविधिक ‘कपीराइट’ समस्याका कारण आयोजकले प्रतियोगीहरूको प्रस्तुति र मतदान प्रक्रियालाई फेसबुकमा स्थानान्तरण गरेको थियो। यस चुनौतीपूर्ण परिस्थितिमा पनि प्रतियोगीहरूले देखाएको धैर्यता र दर्शकहरूले प्रदान गरेको अपार मायाले प्रतियोगितालाई थप उचाइ प्रदान गरेको छ।
निर्णायक मण्डलको भूमिका: यस प्रतियोगिताको अन्तिम चरणमा चर्चित गायक तथा संगीतकारहरू तुलसी सिवाकोटी, सहिमा श्रेष्ठ र धीरज राईको विशेष उपस्थिति रहेको थियो। निर्णायकहरूको प्राविधिक पक्षको मूल्याङ्कन र डिजिटल भोटिङलाई एकीकृत गरी अन्तिम नतिजा घोषणा गरिएको हो।
आयोजकको प्रतिबद्धता: ‘नागरिक बोली’ ले प्रवासमा रहेका नेपाली प्रतिभाहरूलाई उचित मञ्च प्रदान गर्न सधैँ अग्रणी भूमिका खेल्ने प्रतिबद्धता दोहोर्याएको छ। आयोजक समितिका अनुसार, विजेताहरूलाई विशेष समारोहका बीच पुरस्कार, ट्रफी र प्रमाण-पत्र वितरण गरिनेछ।
प्रतियोगितालाई सफल बनाउन अहोरात्र खट्नुहुने स्वयंसेवक, प्रायोजक र सम्पूर्ण शुभचिन्तकहरूलाई ‘नागरिक बोली’ परिवार हार्दिक धन्यवाद ज्ञापन गर्दछ।
विजेताहरूको संक्षिप्त स्कोर-कार्ड:
- प्रथम: निशा बिश्वोकर्मा (७६.३३)
- द्वितीय: डोल्मा योल्मो (७१.१८)
- तृतीय: मिङ्गमार दोर्जे लामा (४७.०३)
- चौथो: दुर्गा कार्की (४५.६१)
- पाचौ: समीर भट्टराई (२९.६४)
